صفحۂ اول    ہمارے بارے میں    رپورٹر اکاونٹ    ہمارا رابطہ
منگل 15 اکتوبر 2019 

لہسن اور پیاز چھاتی کے سرطان سے بچانے میں مددگار

اکثریت ڈیسک | بدھ 25 ستمبر 2019 

لہسن اور پیاز ایشیا میں ایک عرصے سے استعمال ہورہی ہیں اور اب ان کے متعلق اچھی خبر یہ آئی ہے کہ ان دونوں جادوئی سبزیوں کا بھرپور اور مسلسل استعمال خواتین کو چھاتی کے سرطان (بریسٹ کینسر) سے محفوظ رکھتا ہے۔

رپورٹ میں کہا گیا ہے کہ پیاز اور لہسن کا جتنا استعمال کیا جائے تو چھاتی کے سرطان کا خطرہ اتنا ہی کم ہوتا جاتا ہے۔ اس ضمن میں یونیورسٹی آف بفیلو میں پی ایچ ڈی طالبہ گوری ڈیسائی نے دو وجوہ سے پورٹو ریکو کا رخ گیا جہاں خواتین میں بریسٹ کینسر کی شرح بہت کم ہے اور دوم وہاں ایک طرح کی چٹنی ’سوفریٹو‘ بہت کھائی جاتی ہے جس میں لہسن اور پیاز شامل ہوتی ہے۔

گوری ڈیسائی نے ہسپتالوں کے ریکارڈ چیک کرکے 314 خواتین کا پتا لگایا جن کی عمریں 30 سے 79 برس تھیں اور وہ 2008ء سے 2014ء کے درمیان چھاتی کے سرطان کی شکار ہوئی تھیں۔ اسی عمر کی دیگر 346 صحت مند خواتین کا جائزہ بھی لیا گیا۔

اب تمام شرکا سے کھانے پینے کی عادات اور بالخصوص لہسن اور پیاز کھانے کے بارے میں سوالات کیے گئے جس میں سوفریٹو چٹنی کے بارے میں بھی پوچھا گیا۔

بغور جائزے کے بعد معلوم ہوا کہ جن خواتین نے لہسن اور پیاز والی چٹنی کھانے کو معمول بنایا ان میں شماریاتی لحاظ سے بریسٹ کینسر کا خطرہ بہت کم تھا۔ اس طرح اگر لہسن اور پیاز کو باقاعدہ معمول بنالیا جائے تو چھاتی کے سرطان کا خطرہ 67 فیصد تک کم کیا جاسکتا ہے۔

یہی وجہ ہے پورٹو ریکو کی خواتین میں چھاتی کے سرطان کی شرح بہت کم ہے لیکن لہسن اور پیاز میں ایسا کیا ہے جو کینسر جیسے موذی مرض کو روکتی ہیں؟

سائنس بتاتی ہے کہ لہسن اور پیاز میں آرگینوسلفر اور فلیوونولز بکثرت پائے جاتے ہیں جن میں سرطان کو روکنے کی اچھی خاصی صلاحیت موجود ہوتی ہے۔ اس بنا پر دونوں سبزیوں کو ضدِ سرطان (اینٹی کینسر)غذائیں قرار دیا جاسکتا ہے۔

ہمارے بارے میں جاننے کے لئے نیچے دئیے گئے لنکس پر کلک کیجئے۔

ہمارے بارے میں   |   ضابطہ اخلاق   |   اشتہارات   |   ہم سے رابطہ کیجئے
 
© 2019 All Rights of Publications are Reserved by Aksriyat.
Developed by: SuperWebz.com
تمام مواد کے جملہ حقوق محفوظ ہیں © 2019 اکثریت۔