این اے 60: الیکشن ملتوی کرنے کیخلاف درخواست پر فیصلہ محفوظ

لاہور ہائیکیورٹ کے راولپنڈی بنچ نے این اے 60 سے الیکشن ملتوی کرنے کیخلاف درخواست پر فیصلہ محفوظ کر لیا۔ شیخ رشید کی درخواست پر جسٹس مجاہد مستقیم کچھ دیر بعد فیصلہ سنائیں گے۔

عوامی مسلم لیگ کے سربراہ شیخ رشید احمد کی جانب سے ان کے وکیل سردار عبدالرزاق نے لاہور ہائیکورٹ راولپنڈی بینچ میں درخواست دائر کی، جس میں موقف اپنایا گیا ہے کہ ایفی ڈرین کوٹہ کیس میں شیخ رشید کے مد مقابل امیدوارحنیف عباسی کو عمر قید کی سزا سنائی گئی، جس پر الیکشن کمیشن نے این اے 60 راولپنڈی کا الیکشن ملتوی کر دیا ہے، امیدوار کو سزا ہونے پر الیکشن ملتوی نہیں ہوسکتا، کسی امیدوار کو عدالت سے سزا ہونے کا خمیازہ ووٹرز کیوں بُھگتیں؟ مریم نواز، کیپٹن (ر) صفدرکو سزا پر حلقوں کا الیکشن ملتوی نہیں ہوا۔

درخواست میں استدعا کی گئی ہے کہ الیکشن کمیشن کا انتخاب ملتوی کرنے کا نوٹیفکیشن کالعدم قرار دے کر 25 جولائی کو انتخاب کرانے کا حکم دیا جائے، شیخ رشید نے درخواست میں الیکشن کمیشن آف پاکستان اور ریٹرننگ افسر کو فریق بنایا ہے۔