غیر رجسٹرڈ گاڑیوں' کالے شیشوں کے استعمال پر 3932افراد پر جرمانے عائد

پشاورسٹی ٹریفک پولیس پشاور نے غیر رجسٹرڈ موٹر سائیکلوں' کالے شیشوں اور فینسی نمبر پلیٹ لگانے والوں کیخلاف جاری مہم کے دوران 3932 افراد پر جرمانے عائد کئے گئے۔سی سی پی او پشاورمحمد علی گنڈاپور کی ہدایت پر سٹی ٹریفک پولیس پشاور نے شہر کے مختلف سیکٹروں میں ناکہ بندیاں کیں جہاں پر غیر رجسٹرڈ گاڑیاں چلانے' کالے شیشے اور فینسی نمبر پلیٹ استعمال کرنیوالوں کے خلاف کارروائیاں کیں جس کے تحت کالے شیشے استعمال کرنے پر 953، غیر رجسٹرڈ گاڑیاں اور موٹر سائیکلیں چلانے پر 184 اور فینسی نمبر پلیٹ کے استعمال پر 2795 افراد کیخلاف کارروائی عمل میں لائی گئی اور گاڑیوں سے کالے شیشے اور فینسی نمبر پلیٹ اتارے اور خلاف ورزی کرنیوالوں پر جرمانے عائد کئے۔ واضح رہے کہ یہ مہم یکم محرم الحرام سے شروع کیا گیا تھا جو تاحال جاری ہے۔ ایس ایس پی ٹریفک وسیم احمد خلیل نے ٹریفک ہیڈ کوارٹر گلبہار سے جاری کردہ پریس ریلیز میں کہا ہے کہ ٹریفک عملہ قوانین پر عملدرآمد یقینی بنانے کے لئے تمام تر صلاحیتیں بروئے کار لائے گی جبکہ خلاف ورزی کرنیوالوں کے خلاف سخت قانونی کارروائی عمل میں لائے گی۔ انہوں نے مزید کہا کہ کالے شیشوں کے استعمال' غیر رجسٹرڈ گاڑیاں چلانے اور فینسی نمبر پلیٹ کے استعمال پر پابندی عائد ہے جس کے خلاف سٹی ٹریفک پولیس پشاور الرٹ ہے اور کسی کے ساتھ نرمی نہیں برتی جائیگی کیونکہ قانون ہر خاص و عام کیلئے یکساں ہے جس سے کوئی مبرا نہیں ہے۔ انہوں نے مزید کہا کہ شہری ٹریفک عملے کے ساتھ تعاون کریں اور ٹریفک قوانین کی پاسداری کرتے ہوئے محب وطن پاکستانی ہونے کا ثبوت دیں۔