صفحۂ اول    ہمارے بارے میں    رپورٹر اکاونٹ    ہمارا رابطہ
جمعرات اگست 2020 

کورونا وبا ابھی تک موجود، ایس او پیز پر عملدرآمد کرنا ہوگا: اسد عمر کی عوام سے اپیل

ویب ڈیسک | پیر 27 جولائی 2020 

پشاور:  اسد عمر نے عوام سے اپیل کرتے ہوئے کہا کہ کورونا وبا ابھی تک موجود ہے، ایس او پیز پر عملدرآمد کرنا ہوگا، حفاظتی تدابیر اختیار کرلیں تو عیدالاضحیٰ کا مرحلہ بھی گزر جائے گا۔

این سی او سی کے پشاور میں اجلاس کے بعد وفاقی وزیر اسد عمر نے میڈیا کو بریفنگ دیتے ہوئے کہا خیبرپختونخوا میں وبا کے پھیلاؤ میں واضح کمی آ رہی ہے، کورونا چیلنج سے نمٹنے کیلئے صوبائی حکومت نے بھرپور کردار ادا کیا۔ انہوں نے کہا عیدا لاضحیٰ ہر لحاظ سے ایک بڑا دن ہے، قربانی ایسے کریں کہ وبا میں تیزی نہ آئے، عید کو سادگی سے منائیں، اپنی اور دوسروں کی زندگی کی حفاظت ہم سب کی ذمہ داری ہے۔

اسد عمر نے کہا مویشی منڈیوں میں سماجی فاصلہ برقرار رکھتے ہوئے ماسک کا استعمال کریں، پورے خطے میں کورونا کے حوالے سے حوصلہ افزاء صورت حال پاکستان میں ہے، عید پر عوام تفریحی مقامات پر جانے سے گریز کریں، احتیاط کیساتھ عیدالاضحیٰ منائیں۔

 وزیراعلیٰ خیبرپختونخوا محمود کا کہنا تھا ایس او پیز عوام کی جانیں بچانے کیلئے بنائے ہیں، حکومت نے عوامی مفاد کیلئے اقدامات کیے ہیں، عوام ایس او پیز کو فالو کریں اور عید سادگی سے منائیں، تمام وزراء اور ممبران کو کہا ہے عید سادگی سے منائیں۔ انہوں نے کہا عید کے بعد شعبہ سیاحت کھولنے پر بات ہوگی، وزیر اعظم سے سیاحتی مقامات کھولنے کی گزارش کریں گے، عوام عید الاضحیٰ پر اپنے حجروں میں ہجوم سے گریز کریں، عید الاضحیٰ کو کورونا وباء میں شہید ہونے والوں کے نام کرتے ہیں۔

 خیال رہے پاکستان میں کورونا کے تصدیق شدہ کیسز کی تعداد 2 لاکھ 74 ہزار 289 ہوگئی، مہلک وائرس نے مزید 20 افراد کی جان لے لی جس کے بعد اموات کی تعداد 5 ہزار 842 ہوگئی۔

نیشنل کمانڈ اینڈ آپریشن سینٹر کے تازہ ترین اعدادوشمار کے مطابق گذشتہ 24 گھنٹوں کے دوران ایک ہزار 176 نئے کیسز رپورٹ ہوئے، پنجاب میں 92 ہزار 73، سندھ میں ایک لاکھ 18 ہزار 311، خیبر پختونخوا میں 33 ہزار 397، بلوچستان میں 11 ہزار 601، گلگت بلتستان میں ایک ہزار 989، اسلام آباد میں 14 ہزار 884 جبکہ آزاد کشمیر میں 2 ہزار 34 کیسز رپورٹ ہوئے۔

ملک بھر میں اب تک 18 لاکھ 90 ہزار 236 افراد کے ٹیسٹ کئے گئے، گذشتہ 24 گھنٹوں کے دوران 22 ہزار 56 نئے ٹیسٹ کئے گئے، اب تک 2 لاکھ 41 ہزار 26 مریض صحتیاب ہوچکے ہیں جبکہ ایک ہزار 229 مریضوں کی حالت تشویشناک ہے۔

پاکستان میں کورونا سے ایک دن میں 20 افراد جاں بحق ہوگئے جس کے بعد وائرس سے مرنے والوں کی تعداد 5 ہزار 842 ہوگئی۔ پنجاب میں 2 ہزار 116، سندھ میں 2 ہزار 151، خیبر پختونخوا میں ایک ہزار 178، اسلام آباد میں 164، بلوچستان میں 136، گلگت بلتستان میں 48 اور آزاد کشمیر میں 49 مریض جان سے ہاتھ دھو بیٹھے۔

ہمارے بارے میں جاننے کے لئے نیچے دئیے گئے لنکس پر کلک کیجئے۔

ہمارے بارے میں   |   ضابطہ اخلاق   |   اشتہارات   |   ہم سے رابطہ کیجئے
 
© 2020 All Rights of Publications are Reserved by Aksriyat.
Developed by: myk Production
تمام مواد کے جملہ حقوق محفوظ ہیں © 2020 اکثریت۔