شہریوں کو سفری سہولیات اور ان کی زندگیوں کو محفوظ بنانا اولین ترجیح ہے،وسیم خلیل

پشاورسٹی ٹریفک پولیس پشاور کے اہلکار پشاور میں موسلادھار بارش کے باوجود ٹریفک کو رواں دواں رکھنے کے لئے ڈیوٹی سر انجام دیتے رہے۔ تفصیلات کے مطابق ایس ایس پی ٹریفک وسیم احمد خلیل نے شدید بارش کے پیش نظر سٹی ٹریفک پولیس پشاور کے اہلکاروں کو ہدایت کی ھے کہ بارش کے باوجود شہر میں ٹریفک کی روانی کو برقرار رکھا جائے تاکہ شہریوں اور خصوصی طور پر موٹر سائیکل سواروں کو کسی قسم کے مشکلات کا سامنا نہ ہو۔ سٹی ٹریفک پولیس پشاور کے اہلکاروں نے شدید بارش کے باعث سڑک کے بیچ بند ہونیوالی گاڑیوں کو بھی نکالا اسی طرح مختلف اشاروں پر رکنے والے شہریوں اور ٹرانسپورٹروں کو آہستہ ڈرائیونگ کرنیکی تلقین کی تاکہ بارش کے دوران سڑک پر پھسلنے کے باعث کسی بھی قسم کا حادثہ رونما نہ ہو۔ ٹریفک ہیڈکوارٹر سے جاری کردہ پریس ریلیز میں ایس ایس پی ٹریفک وسیم احمد خلیل نے کہا ہے کہ شہریوں کو بلا کسی تکلیف کے سفری سہولیات اور ان کی زندگیوں کو محفوظ بنانا ہماری اولین ترجیح ہے جس سے ہم کسی بھی طور پر غافل نہیں ہیں اور یہ ہماری ڈیوٹی کا حصہ ہے جس کو ہم ہر حالت اپنا فرض سمجھ کر کریں گے۔