منشیات فروشوں کیخلاف کارروائیاں ' خاتون سمیت 4افراد گرفتار

پشاور کیپٹل سٹی پولیس پشاور نے منشیات کے خلاف جاری کریک ڈاؤن کے دوران خاتون سمیت چار افراد کو گرفتار کر لیا، گزشتہ روز ہونے والے کاروائیوں میں ایک خاتون منشیات سمگلر بھی شامل ہے جو ضلع خیبر کی جانب سے منشیات پشاور سمگل کرنے کی کوشش کر رہی تھی، گرفتار ملزمان نے ابتدائی تفتیش کے دوران منشیات کے مکروہ دھندے میں ملوث ہونے کا اعتراف کر لیا ہے جن کے قبضے مجموعی طور پر 17 کلو گرام سے زائد چرس، ایک کلو گرام افیون اور ہزاروں روپے مالیت کی آئس بھی برآمد کر لی گئی ہے جن کے خلاف مقدمات درج کرکے تفتیش شروع کر دی گئی۔تفصیلات کے مطابق کیپٹل سٹی پولیس پشاور نے منشیات فروشوں اور جرائم پیشہ افراد کے خلاف جاری کریک ڈاؤن کے دوران مزید چار ملزمان کو گرفتار کر لیا ہے، جس کے دوران ایس ایچ او تھانہ بڈھ بیر بلال مہمند نے پولیس ٹیم اور لیڈیز پولیس کے ہمراہ کاروائی کے دوران موٹر کار نمبر 9463 کو روک کر تلاشی لینے پر گاڑی کے خفیہ خانوں سے 10 کلو گرام چرس اور ایک کلو گرام افیون برآمد کرکے خاتون سمگلر مسماة (س) زوجہ اختیار شاہ اور شبیر ولد حسین سکنہ جمرود کو گرفتار کر لیا۔اسی طرح تھانہ پھندو پولیس نے ملزم عزیر خان ولد ثناء اللّٰلہ سکنہ صوابی کو گرفتار کرکے اس کے قبضے سے 6 کلو گرام چرس جبکہ تھانہ خزانہ پولیس نے منشیات فروش ہدایت اللّٰلہ ولد انور شاہ کو گرفتار کرکے اس کے قبضے سے ایک کلو گرام سے زائد چرس اور ہزاروں روپے مالیت کی آئس برآمد کر لی ہے، گرفتار تمام ملزمان کے خلاف مقدمات درج کرکے تفتیش شروع کر دی گئی ہے۔