کراچی ٹیسٹ کا چوتھا روز: پاکستان نے دوسری اننگز 555 رنز پر ڈیکلیئر کردی

اوپنرز کے بعد قومی ٹیم کے کپتان اظہر علی اور بابر اعظم کی سنچریوں کی بدولت پاکستان نے سری لنکا کے خلاف دوسرے ٹیسٹ کی دوسری اننگز میں 3 وکٹوں کے نقصان پر 555 رنز بنا کر ڈیکلیئر کردی۔

نیشنل اسٹیڈیم کراچی میں کھیلی جارہی سیریز کے دوسرے اور آخری ٹیسٹ میچ میں پاکستان کو سری لنکا پر 475 رنز کی برتری حاصل ہے اور قومی ٹیم نے سری لنکا کو جیت کے لیے 476 رنز کا ہدف دیا ہے۔

چوتھے روز جب کھیل کا آغاز ہوا تو قومی ٹیم نے 385 رنز سے اپنی دوسری اننگز کو آگے بڑھایا جبکہ کپتان اظہر علی 57 اور بابر اعظم 22 رنز بنا کر کریز پر موجود تھے۔

دوسرے ٹیسٹ کی دوسری اننگز کے دوران کپتان اظہر علی فارم میں نظر آئے اور 118 رنز بنا کر لاستھ ایمبولڈینیا کی گیند پر آؤٹ ہوگئے۔

اظہر علی کے آؤٹ ہونے کے بعد بابراعظم نے محمد رضوان کے ساتھ اسکور کو آگے بڑھاتے ہوئے سری لنکا کے خلاف دوسری اننگز میں سنچری اسکور کی اور دوسری اننگز میں سنچری بنانے والے چوتھے کھلاڑی تھے۔

پاکستان نے 3 کھلاڑیوں کے نقصان پر 555 رنز کی دوسری اننگز ڈیکلیئر کی تو بابر اعظم سنچری جبکہ محمد رضوان 21 رنز بنا کر ناٹ آؤٹ رہے۔

تیسرے روز عابد علی اور شان مسعود کی شان دار بلے بازی کی بدولت پاکستان نے سری لنکا کے خلاف دوسرے ٹیسٹ کی دوسری اننگز میں 2 وکٹوں پر 385 رنز بنا کر 315 رنز کی برتری حاصل کرلی تھی۔

شان مسعود 135 رنز بناکر کمارا کی گیند پر کیچ آؤٹ ہوگئے، انہوں نے اپنے کیریئر کی دوسری سنچری بنائی جبکہ دوسرے اینڈ سے اوپنر عابد علی نے بھی مسلسل دوسرے ٹیسٹ میں دوسری سنچری مکمل کرکے ایک اور ریکارڈ اپنے نام کیا تھا۔

یاد رہے کہ عابد علی اپنے کیریئر کے پہلے ٹیسٹ میں سنچری بنا کر ٹیسٹ اور ون ڈے ڈیبیو پر سنچری بنانے والے دنیا کے پہلے بلے باز بن گئے تھے تاہم اب وہ لگاتار دوسرے ٹیسٹ میچ میں بھی سنچری بناکر منفرد ریکارڈ بنانے والے پہلے پاکستانی کرکٹر بن گئے۔

پاکستان نے دوسری اننگز کا آغاز کیا تو اوپنرز عابد علی اور شان مسعود نے ٹیم کو پراعتماد آغاز فراہم کیا اور دوسرے روز کا اختتام قومی ٹیم کے لیے بغیر کسی نقصان کے ہوا تھا جو تیسرے روز کے لیے نیک شگون ثابت ہوا۔

پہلی اننگز

یاد رہے کہ پاکستانی ٹیم کی بیٹنگ لائن پہلی اننگز میں ناکامی سے دوچار ہوئی تھی اور پوری ٹیم 191رنز پر ڈھیر ہو گئی تھی۔

بعد ازان کھیل کے دوسرے روز سری لنکا نے اپنی پہلی اننگز میں 271 رنز بنا کر 80 رنز کی قیمتی برتری حاصل کرلی تھی جبکہ پاکستانی باؤلرز نے بھی اچھی کارکردگی دکھائی تھی۔

پاکستان کی جانب سے شاہین شاہ آفریدی نے عمدہ باؤلنگ کرتے ہوئے 5 اور محمد عباس نے 4وکٹیں حاصل کی تھیں۔

تاہم یاسر شاہ ایک مرتبہ پھر ناکام رہے اور 43رنز دینے کے باوجود کوئی وکٹ حاصل نہیں کرپائے نوجوان فاسٹ باؤلر نسیم شاہ کے حصے میں بھی کوئی وکٹ نہیں آئی۔

واضح رہے کہ پاکستان نے دوسرے ٹیسٹ کے لیے ٹیم میں ایک تبدیلی کی ہے جہاں فاسٹ باؤلر عثمان شنواری کی جگہ یاسر شاہ کو شامل کیا گیا ہے۔

راولپنڈی میں کھیلا گیا پہلا ٹیسٹ 3 سے 4 روز تک جاری رہنے والی بارش کی آنکھ مچولی کے باعث برابری پر ختم ہوا تھا لیکن پاکستان کے بلے باز عابد علی نے سنچری بنا کر اپنی بہترین فارم کا ثبوت دیا تھا۔

تاہم قومی ٹیم یہ ٹیسٹ میچ جیت کر 10 سال بعد ملک میں ہونے والی ٹیسٹ سریز کو فتح کے ساتھ یادگار بنانا چاہتی ہے۔