نان کسٹم پیڈ سامان سمگل کرنے کی کوشش ناکام

پشاور() کیپٹل سٹی پولیس نے نان کسٹم پیڈ اشیاء کی سمگلنگ کی اطلاع پر کارروائی کرتے ہوئے غیر ملکی کپڑا اور دیگر اشیاء سمگل کرنے کی کوشش ناکام بنا دی، خفیہ اطلاع پر ہونے والی کارروائی کے دوران برآمد ہونے والے کپڑے اور دیگر سامان کی مالیت لاکھوں روپے بتائی جا رہی ہے جو غیر قانونی طریقے سے دیگر شہروں کو سمگل کیا جا رہا تھا، برآمد ہونے والے تمام نان کسٹم پیڈ سامان کو قانونی چارہ جوئی اور کسٹم ڈیوٹی ادائیگی کی غرض سے کسٹم حکام کے حوالے کر دیا گیا ہے

تفصیلات کے مطابق گزشتہ روز ایس پی کینٹ محمد اشفاق خان کو خفیہ ذراءع سے اطلاع ملی تھی کہ کچھ افراد غیر قانونی طریقے سے نان کسٹم پیڈ اشیاء سمگل کرنے کی کوشش کریں گے، ملنے والی خفیہ اطلاع پر اے ایس پی حیات آباد حیدر علی کی نگرانی میں ایس ایچ او تھانہ پشتخرہ نعمان خان نے فوری کارروائی کرتے ہوئے غیر ملکی کپڑا اور دیگر اشیاء برآمد کر لیں جس کی مالیت لاکھوں روپے بتائی جا رہی ہے، برآمد ہونے والا نان کسٹم پیڈ سامان ملک کے دیگر شہروں کو سمگل کرنے کی کوشش کی جارہی تھی جسے ضروری کارروائی کے بعد کسٹم ڈیوٹی (ٹیکس) کی ادائیگی اور مزید قانونی چارہ جوئی کی خاطر کسٹم آفیسر محمد یوسف خان کے حوالے کر کے کسٹم ہاوس منتقل کر دیا گیا ہے