معمر رانا کی سیاست میں انٹری، پیپلز پارٹی میں شامل

معروف لولی وڈ اداکار معمر رانا نے چئیرمین پیپلز پارٹی بلاول بھٹو زرداری سے لاہور میں‌ ملاقات کی جہاں انہوں نے پارٹی میں شمولیت کا فیصلہ کر لیا۔

معمر رانا نے پیپلز پارٹی کے منشور اور پروگرام سے اتفاق کرتے ہوئے پارٹی میں شمولیت کا اعلان کیا۔

ڈان کے مطابق معمر رانا کا اس موقع پر کہنا تھا کہ پیپلز پارٹی واحد جماعت ہے جو ثقافت کی ترقی پر یقین رکھتی ہے۔

جبکہ ان کا یہ بھی کہنا تھا کہ بلاول بھٹو زرداری ہی اب وہ واحد امید ہیں جو ملک کو آگے لے کر جا سکتے ہیں۔

معمر رانا کے ساتھ ان کی اہلیہ مہناز بھی اس ملاقات میں شریک ہوئیں۔

اس موقع پر پیپلز پارٹی پنجاب کے جنرل سیکرٹری چودھری منظور احمد اور سیکرٹری اطلاعات سید حسن مرتضیٰ بھی موجود تھے۔

جبکہ دیگر پارٹی ممبران بھی اس ملاقات کا حصہ بنے۔

یاد رہے کہ معمر رانا نے متعدد اردو اور پنجابی فلموں میں کام کر کے خوب نام کمایا۔

وہ ان دنوں بطور ہدایت کار فلم سکندر کی شوٹنگ میں مصروف ہیں جس میں وہ خود اہم کردار بھی نبھائیں گے۔

معمر رانا ٹی وی ڈراموں میں بھی اداکاری کے جوہر دکھا چکے ہیں۔

واضح رہے کہ معمر رانا واحد پاکستانی اداکار نہیں جو پاکستان پیپلز پارٹی کا حصہ بنے۔

ان سے قبل شوبز کے معروف اداکار ساجد حسن اہل خانہ سمیت پیپلزپارٹی میں شامل ہوئے تھے۔

جبکہ 2 سال قبل ڈرامہ انڈسٹری کے معروف اداکاروں ایوب کھوسہ اور قیصر نظامانی نے بھی پیپلزپارٹی میں شمولیت اختیار کی تھی جس کے بعد دونوں کو پی پی قیادت نے ملکی کلچر مضبوط کرنے کی ذمہ داری دی تھی۔

ایوب کھوسہ نے گزشتہ برس الیکشن میں بھی حصہ لیا تھا تاہم وہ کامیاب نہیں ہو سکے تھے۔