لائن ٹریفک بحالی کیلئے تشہیری اور آگاہی مہم شروع

پشاور سٹی ٹریفک پولیس پشاور نے لائن ٹریفک بحال کرنے اور ٹریفک قوانین پر عملدرآمد کرنے کیلئے تشہیری اور آگاہی مہم کے سلسلے میں ایس ایس پی ٹریفک وسیم احمد خلیل نے ملٹری پولیس کے ہمراہ باڑہ روڈ پر شہریوں اور ٹرانسپورٹروں کو لائن ٹریفک بحال کرنے ہیلمٹ اور سیٹ بیلٹ کے استعمال سمیت تیز رفتاری اوور لوڈنگ اور ون ویلنگ سے گریز کرنے سے متعلق شہریوں کو آگاہی دی اس موقع پر ڈی ایس پی ایجوکیشن شازیہ شاہد اور ان کی ٹیم بھی موجود تھی۔ ڈی ایس پی ایجوکیشن اور ان کی ٹیم نے شہریوں میں ٹریفک قوانین پر عملدرآمد سے متعلق پمفلٹس بھی تقسیم کئے۔ ایس ایس پی ٹریفک وسیم احمد خلیل نے کہا کہ ٹریفک قوانین پر عملدرآمد کرنے سے حادثات میں کمی آنے سمیت ٹریفک میں خلل نہیں پڑیگا جس سے شہری بروقت اپنے منزل مقصود تک پہنچ سکیں گے اور اگر کوئی بھی شخص ٹریفک قوانین کی خلاف ورزی کریگا تو وہ نہ صرف ٹریفک میں خلل کا باعث بن رہا ہے بلکہ وہ ایک غیر ذمہ دار شہری بھی ہے جو شہریوں کی مشکلات میں اضافہ کر رہا ہے یہ ہم سب کی ذمہ داری ہے کہ ہم ٹریفک نظام کو منظم طریقے سے چلائیں کیونکہ اکثر اوقات ایک ڈرائیور کی غلطی سے گاڑیوں کی لمبی قطاریں لگ جاتی ہیں جس میں ایمولینسز بھی پھنس جاتی ہیں جس سے قیمتی جانوں کا ضیاع بھی ہو سکتا ہے۔ انہوں نے کہا کہ شہری ٹریفک قوانین پر عملدرآمد کرتے ہوئے شہر میں ٹریفک نظام کو بہتر بنانے میں اپنا کردار ادا کریں اور سٹی ٹریفک پولیس پشاور کے ساتھ تعاون کریں۔ترجمان سٹی ٹریفک پولیس پشاور