خیبر پختونخوا حکومت نے بلدیاتی نظام ختم ہونے پر منتخب نمائندوں سے اثاثے تحویل میں لینے کے احکامات جاری کر دیئے ہیں منتخب نمائندوں کی مدت 28اگست کوختم ہو رہی ہے صوبائی حکومت نے مدت مکمل ہونے سے قبل اثاثوں کو تحویل میں لے لیا جائے ۔
محکمہ بلدیات خیبر پختونخوا کی جانب سے صوبے کے تمام ڈپٹی کمشنرز، ڈائریکٹر جنرل سٹی ڈسٹرکٹ گورنمنٹ پشاور، اسسٹنٹ ڈائریکٹر لوکل گورنمنٹ اور تحصیل و ٹائون میونسپل ایڈمنسٹریشنز کو بھیجے گئے مراسلے میں کہاگیا ہے کہ 28اگست کو موجودہ بلدیاتی نظام کی مدت مکمل ہو رہی ہے ایسے میں پشاور کے ناظم اور نائب ناظم سے سرکاری گاڑی، دفتر بمعہ فرنیچر، آفس ریکارڈ اور دیگر منقولہ و غیر منقولہ اثاثے ڈائریکٹر جنرل سٹی ڈسٹرکٹ گورنمنٹ تحویل میں لیں گے
صوبے کے دیگر تمام ضلعی ناظم و نائب ناظمین سے مذکورہ اثاثے ان کے متعلقہ ڈپٹی کمشنرز اپنی تحویل میں لیں گے تحصیل و ٹائون ناظمین سے مذکورہ اثاثے متعلقہ تحصیل و ٹائون میونسپل ایڈمنسٹریٹر تحویل میں لیں گے ویلج و نیبر ہڈ ناظمین سے دفتر، فرنیچر اور سرکاری ریکارڈ بذریعہ متعلقہ ویلج و نیبر ہڈ کونسل کے سیکرٹری اسسٹنٹ ڈائریکٹر لوکل گورنمنٹ وصول کریں گے ۔
محکمہ بلدیات کی جانب سے تمام حکام کو ہدایت جاری کی گئی ہے کہ مذکورہ اثاثے اپنی تحویل میں لینے کے بعد انکی حفاظت کی جائے جبکہ غیر متعلقہ فرد کو ان کے استعمال کی ہرگز اجازت نہیں ہو گی اسی طرح اثاثے تحویل میں لینے کی رپورٹ تمام ڈپٹی کمشنرز محکمہ بلدیات، ڈائریکٹر جنرل بلدیات اور لوکل کونسل بورڈ کو 29اگست تک جمع کرانے کے پابند ہونگے۔