وزیراطلاعات شوکت یوسفزئی نے گل بہارپل کے نیچے کرکٹ کھیلی

خیبر پختونخوا کے وزیر اطلاعات وتعلقات عامہ شوکت علی یوسفزئی نے اتوار کے روز جی ٹی روڈ گلبہار پل کے نیچے علاقے کے نوجوانوں کھلاڑیوں کے ساتھ کرکٹ کھیلی۔ انھوں نے اوپننگ بلے بازی کرتے ہوئے 16رنز بنائے اور ایک اوور بھی کرایا جس میں ایک وکٹ بھی حاصل کی۔ وزیر اطلاعات اپنے گھر جا رہے تھے کہ جی ٹی روڈ پر نوجوانوں کو کھیلتے دیکھا۔
انہوں نے گاڑی روکی اور وہاں پہنچ گئے۔ نوجوانوں نے شوکت علی یوسفزئی کو دیکھ کر خوشی کا اظہار کیا اور کھیلنے کی دعوت دی جس پر وہ کھیلنے کے لئے تیار ہوئے اور اوپننگ میں نکل کر ایک چھکے کی مدد سے 16رنز بنائے اور آؤٹ ہو گئے بعد میں فیلڈنگ میں بھی حصہ لیا اور ایک اوور کراکر ایک وکٹ بھی حاصل کی۔

بچوں نے میچ کے اختتام پر صوبائی وزیر شوکت علی یوسفزئی کے ساتھ سیلفیاں بنائیں جبکہ صوبائی وزیر کو بغیر کسی پروٹوکول کے کھلی فضا میں پل کے نیچے بچوں کے ساتھ کھیلتے ہوئے دیکھ کر کافی لوگ جمع ہوگئے اور تصویریں بنائیں۔
اس پر صوبائی وزیر شوکت علی یوسفزئی نے کہا کہ انہیں اس طرح کھیلتے ہوئے بہت مزہ آیا۔ کافی عرصہ بعد ان کو یہ موقع میسر آیا اور بغیر کسی خوف و پروٹوکول کے علاقے کے بچوں کے ساتھ کرکٹ کھیلی ۔پل کے نیچے کھیلتے ہوئے نوجوانی کی یاد تازہ ہوئی۔انہوں نے اس موقع پر پر کہا صوبائی حکومت کھیلوں پرخصوصی توجہ دے رہی اورنواجوں کو کھیلوں کے مواقع فراہم کرنے کے لئے ہر ضلع کے سطح پر کھیلوں کے گرائوں تعمیر کر رہی ہے جس سے نیا ٹیلنٹ سامنے آئے گا۔